చిలుకూరు బాలాజీ ఆలయంలో విశిష్ట ఆధ్యాత్మిక–సంగీత కార్యక్రమం

రంగారెడ్డి జిల్లా మొయినాబాద్ మున్సిపాలిటీ పరిధిలోని ప్రసిద్ధ చిలుకూరు బాలాజీ ఆలయంలో విశిష్టమైన ఆధ్యాత్మిక–సంగీత కార్యక్రమం అత్యంత భక్తిశ్రద్ధలతో నిర్వహించబడింది.

తెలంగాణ భక్తి సంగీత సంపదలో ప్రత్యేక స్థానం కలిగిన శ్రీ రాకమచర్ల వెంకటదాసు గారి 11 కీర్తనలను, శేషులతా విశ్వనాథ్ స్వరరచనలో, సంప్రదాయ భజన శైలిలో స్వామివారి సన్నిధిలో మొట్టమొదటిసారిగా గానం చేయడం ఈ కార్యక్రమానికి ప్రధాన ఆకర్షణగా నిలిచింది. ఈ అపూర్వ ఘట్టం భక్తుల హృదయాలను హత్తుకొని ఆధ్యాత్మికానుభూతిని కలిగించింది.

ఈ కార్యక్రమంలో డాక్టర్ ఎం.వి. సౌందర్ రాజన్, గోపాలకృష్ణ స్వామి (అర్చక ధర్మకర్తలు) ప్రత్యేక అతిథులుగా పాల్గొన్నారు.

ఆలయ ప్రధాన అర్చకుడు రంగరాజన్ ప్రతి కీర్తనపై లోతైన సంగీత–సాహిత్య విశ్లేషణ అందించారు. కీర్తనల్లోని రాగభావం, ఆధ్యాత్మికత, దాస సంప్రదాయ లక్షణాలు, వాగ్గేయకారుల శైలి వంటి అంశాలను భక్తులకు సులభంగా అర్థమయ్యే విధంగా వివరించి కార్యక్రమానికి ప్రత్యేక శోభను చేకూర్చారు.

ఈ వేడుకలో ప్రముఖ కర్ణాటక సంగీత విద్వాంసులు శ్రీమాన్ రాఘవాచార్యులు, శేషులతా విశ్వనాథ్, ప్రతిమ శశిధర్, విద్యాభారతి తదితరులు పాల్గొని తమ సంగీత మాధుర్యంతో భక్తులను పరవశింపజేశారు.

ఈ కార్యక్రమం భక్తి, సంగీతం, సంప్రదాయం సమన్వయంగా నిలిచిన ఒక విశిష్ట ఆధ్యాత్మిక వేడుకగా నిలిచింది.